تاكسي...حواديت المشاوير (3 من 3)ـ

أختم معكم ما بدأته من ما اخترته لكم من فصول كتاب تاكسي - حواديت المشاوير لخالد الخميسي ... و حدوتة اليوم عن البورصه

حدوته رقم 17

أهرامات الجيزه هي الاثر الوحيد الباقي من عجائب الدنيا السبع...نموذج للروعه و الكمال،عجيبه و غريبه من الغرائب.

و هذا السائق فؤاد بطوله الشاهق و عوده الارفع من عود القصب هو أحد عجائب السائقين السبع..سائق تاكسي و متخصص في البورصه و مضارب عتيد و نجم النجوم و محور اهتمام اقربائه و اصدقائه،لأنه جعل من بعضهم اغنياء في أيام، و مراقب بعيني الصقر - على حد قوله - لأي تحرك في أي سهم..عالم البورصه و حركة الاسهم هي عالمه الاول ثم يأتي عالمه الثاني التاكسي

.

فؤاد : البورصه مش مقامره انما مغامره يعني فرق نقطه أو فرق حرف واحد..و انت عارف لو دخل في الدم مش ممكن يطلع تاني..اصعب بكتير من تبطيل السجاير

.

أنا : طب ما تتفرغ للموضوع..ده صاحب بالين كدّاب

.

فؤاد : انا لي بال واحد كله في البورصه انما السواقه مش محتاجه بال محتاجه خبره و انا خبير و بعدين السواقه في دمي برضه و دي شغلتي الاصليه اللي باكل منها عبش..و العربيه دي عربيتي مش مأجرها،بس فلوس البورصه دي عامله زي الحلو..انشالله ما الواحد اكل حلو..المهم انه ياكل اصلا،و لو معاك،كُل حلو..فلوس البورصه مش مضمونه ممكن تطاعك فجأه لفوق و بعدين تخفس بيك الأرض فجأه

انا مثلا بألعب بفلوس حوالي عشرين واحد من اهلي و اصحابي..واخد من كل واحد منهم مبلغ من زمان و بعد كده بنتقابل على القهوه..و اقعد احكي لهم انا حأعمل اي..و بعدين فيه ثقة..مديني فلوس من غير كمبيالات و لا حاجه..اهم حاجه الثقة و انا الحساب في شركة السمسره بإسمي لوحدي

.

أنا : يعني ايه حسابك في شركة السمسره أنا اصلا ماليش في اللعبه دي خالص

.

فؤاد : بص يا سيدي - باختصار - انت لازم تروح الاول تفتح حساب باسمك..اسمك بيتكّود..اسمها كده يتكّود يعني بتسجل في شركة مصر للمقاصه..و بعدين تشوف عايز تشتري ايه و تبيع ايه،و تبلغ الديلر بتاعك..انا بروح قدام شاشة البورصه في شقة تبع البورصه في شارع البورصه بوسط البلد..و أشوف الحركه عاملة ازاي و أشتري و أبيع،و بالليل بدخل على إنترنت كافيه في مواقع بتديك الاسعار بس متأخره ربع ساعه زي أراب فايننس دوت كوم..تدّخل كود الشركه اللي عايز تعرف سعرها و عيش حياتك

.

أنا : ياه ده انت متخصص بجد

فؤاد : اسأل علي..ده كل الناس بتيجي تسألني أشتري ايه و ابيع ايه

.

أنا : و بتكسّبهم ؟

فؤاد : و الله من كام يوم خرّبت بيتهم و بيتي، يوم التلات اللي فات..يوم ما يتنسيش،كان 14 مارس..انا متعود إن انا باسوق الصبح بدري و على نص النهار بروح اشوف ايه الاخبار..لقيت لك البورصه بتنهار..و انا كنت شاري للشله بتاعتي في شركتين..النساجون الشرقيون..و حديد عز..و لقيت السهم عمال يقع..النساجون كنت انا شاريه بتلاته و تمانين جنيه،لقيته عمال يقع قدامي لغاية ما وصل لواحد و ستين جنيه..أنا قلت حيكمل وقيع و لقيت لك حديد عز اللي انا كنت مشتريه بتسعه و سبعين جنيه وقع لخمسه و خمسين جنيه.قلت خراب بيوت مستعجل و أكيد البورصه وقعت و الأسعار ح تكمل في النازل

..

قلت اخرج متعور بدل ما اتشخرم..بعت بخساره حوالي 30%..انا كنت يوميها بألعب في حوالي تلاتين ألف جنيه..خسرت حوالي تسعة آلاف جنيه في ساعتين

.

و لقيت ركبي بترعش و مش عارف أصلب طولي..قعدت على القهوه و انا حاسس اني ح اموت..و بعدها رحت نمت..صحيت من النوم لقيت لك الاسعار طلعت تاني على ما كانت عليه..بصراحه ضحكت و سقفت على المعلم اللي لعبها صح..الديناصورات ديناصورات و الدبّان دبّان..و أنا دبّان و بزن علشان أعيش و لكن عرفت يومها إن انا بزن على خراب عشّي

.

لما الاسعار وقعت..كلنا بعنا..فيه حد اشتري..تقول لي مين اللي اشتري؟ اقولك طبعا الناس اللي عارفين ان الاسعار مش حتقع تاني و انها حتطلع..منين جابوا المعلومات انهم يشتروا..دول بقى الحيتان اللي البلد واقفه وراهم..شوف حضرتك أما السهم يقع حوالي عشرين جنيه و انت عندك المعلومه..تروح داخل مشتري مليون سهم-خلي بالك ان كل شركه من دول معديه الخميسن مليون سهم-و آخر النهار السهم راجع تاني لسعره رحت بايع..كسبت عشرين مليون جنيه في تلات ساعات..شغل كبير..في يوم واحد خسّروا الدبّان اللي فربوا من المدبحه..و كسّبوا الكام حوت الكبير قوي.

و هو حضرتك بتكتب ايه من الصبح .؟

أنا : بكتب الارقام اللي انت عمّال تقولها لي..هريتني ارقام

فؤاد : ايه عايز تلعب انت كمان؟ هات فلوسك و انا ادخلك في المجموعه بتاعتي

.

أنا : أنا لا بتاع مقامره و لا بتاع مغامره..و بيني و بينك أن رأيي انها مقامره و مغامره..و رأيي انك تقدم انت كمان استقالتك من الجمايه دي طالما الكبار واكلينها

.

فؤاد : ما هي سنة الحياة علشان الكبار يكبروا لازم احنا ما نبطلش زن..أمّال هما حيكبروا ازاي؟

.